atur pamit/pangayubagyo pamit umroh

 

Tuladha : "ATUR PANGAYUBAGYA" 
 
Assalamu'alaikum Wr Wb.   

Bapa-ibu para tamu ingkang winengku ing suka rahayu, linangkung para sesepuh, aji sepuh ingkang sampun buntas salwiring kawruh.   

Para adi lenggah, kakung-putri barayagung dinas pendidikan, ingkang hamanggih suka basuki, langkung rumiyin, sumangga, kula dherekaken, ngaturaken puji syukur pangalembana, wonten ngarsa dalem Allah SWT, Gusti Ingkang Maha Welas lan Asih, ingkang sampun paring katentreman, kawilujengan, tuwin kabagas-warasan, mugi tumama, tumus tumanduk dhumateng panjenengan sedaya, dalasan kula, waradin sedaya kulawarga.   

Bapa-ibu, para tamu ingkang pantes hanampi sih pakurnatan, kula bade hangaturaken wigatosing perlu.   Namung, hambok bilih, atur kula mangke , pinanggih sepen ing semu, sepa ing rasa, sepi tanpa sari, malah kapara nglelingsemi, mugi diagung ing pangaksami.   

Bapa-ibu, ingkang sepisan, kula ngambali atur, ngaturaken pambagya wilujeng, awit keparengipun rawuh bapa-ibu para tamu sedaya, mugi kasekecakna, anggen panjenengan lelenggahan, kanthi sumelehing rasa, mardikaning panggalih.  

Bapa Ibu ingkang kinurmatan,

Ing wekdal punika, kula nyuwun pangapunten saha ngaturaken pambagyo harjo, awit miturut kersaning Gusti Allāh Subḥānahu wa Ta‘ālā, kula kaparingi kasempatan kang sangat wigati, inggih punika tindak ibadah umroh dhateng Tanah Suci wiwit tanggal 9 dumugi 17 Oktober 2025. Ing perjalanan ibadah punika, kula badhé tindak bebarengan kaliyan garwa kula, saha simbok kula, Ibu Sariyem.

kula ugi badhé  cuti wiwit tanggal 9 dumugi 22 Oktober 2025, saéngga kula mboten saged nyambut damel kados biasanipun. Kula nyuwun pangapunten menawi wonten pakaryan ingkang dereng kasembadan utawi tugas ingkang kedah dipun serahaken dhateng rencang sanèsipun.

Kula nyuwun donga pangestu, saking panjenengan sedaya, mugi perjalanan lan ibadah kula saha kulawarga tansah pinaringan kaslametan, kasehatan, kelancaran, lan mugi dados ibadah ingkang mabrur saha maqbul. Kula ugi nyuwun pangapunten ingkang saestu, menawi wonten kalepatan tindak-tanduk, tembung, utawi lampah kula ingkang kirang mranani manah panjenengan sedaya. kerso gih bapa ibu, matur nuwun.

Mugi-mugi ibadah punika, saged dados  tiyang ingkang langkung andhap asor, langkung migunani, lan saged paring paedah langkung ageng tumrap lingkungan menika.

Kula ugi ndedonga, mugi panjenengan sedaya ugi kaparingi kasempatan, rejeki, lan undangan saking Gusti Allāh kangge sowan dhateng Baitullāh ibadah haji tuwin umroh, supados kita sami-sami saged ngalap berkah lan ngraosaken nikmatipun ibadah ing tanah suci.

Saklajengipun, panjenengan sedaya ingkang kersa nglajengaken silaturahmi sak sampunipun  kula wangsul umroh mangke, kula aturi rawuh dhumateng dalem kulo ing dinten Senin, tanggal 20 Oktober 2025, ing Tohudan Wetan RT 7 RW 4, Tohudan, Colomadu, Karanganyar. Mugi kesempatan punika saged dados sarana  nyambung  silaturahmi  kanthi sae.  

Ingkang pungkasan, kulo nglenggana, anggenipun nampi rawuh panjenengan sedaya, wiwit ngaturi palenggahan, punapa dene pasugatan, ingkang kirang damel renaning panggalih panjenengan, najanta tebih sampun karancang, dangu sampun karonce, parandene taksih kathah kirang lan cingkrangipun, kanthi punika nyuwun agunging samudra pangaksami.  

Para pinisepuh, sesepuh, ingkang pantes sinesep sarining kawruh, bapa-ibu para tamu ingkang hamanggih suka rahayu, makaten lan semanten atur kula,  kula ugi nglenggana, kathah tutur ingkang kalantur, basa ingkang singlar saking parama sastra, mugi diagung ing pangaksama.   

Wanci kula konduraken wangsul dhumateng kadang pangendhali wara, nuwun.  Wassalamu'alaikum Wr Wb. 

 

 

Subscribe to receive free email updates: